contentTop

Glemser

Streuobst Moschdade

contentBottom

 

Der Mooscht-Song

 

Auf de schwäb'sche Streuobschtwiesa,
siehsch gar viele Epfel liega,
heb se auf ond nei en Sack
heidawedder zack zack zack.

Ref.: Trulla trulla trullala, trulla trulla trullala
heb se auf ond nei en Sack, heidawedder zack zack zack.

Hosch du dann gnuag Epfel glaubat,
zwischadurch a weng verschnaufat,
lädsch dia Säckla ois zwoi drei,
henda en dein Benz schnell nei.

Ref.: Trulla trulla trullala, trulla trulla trullala
lädsch dia Säckla ois zwoi drei,henda en dein Benz schnell nei.

Ab zom Kiafer ond zur Press,
s'mooschda isch halt scho en Stress
"no nix narrats" sait sich dann
onser kluger Schwobamann.

Ref.: Trulla trulla trullala, trulla trulla trullala
"no nix narrats" sait sich dann onser kluger Schwobamann.

D'Press duat malma, d'Press duat schneida
d'Epfel miassat kherig leida,
bis es endlich isch soweit,
ond's a saubers Säftle geit.

Ref.: Trulla trulla trullala, trulla trulla trullala
bis es endlich isch soweit, ond's a saubers Säftle geit.

Wenn d'r Saft dann isch em Fass
kommat älle mit d'r Tass,
trenkat von dem Mooscht deam siassa,
hendadrei muaß mancher biassa.

Ref.: Trulla trulla trullala, trulla trulla trullala
trenkat von dem Mooscht deam siassa, hendadrei muaß mancher biassa.

D'Hos ver...(hm hm) bis ganz oba,
s'Weib dohoim duat kräftig loba,
ond kommt mit d'r Wurzelbürscht,
dass da wieder sauber wirscht.

Ref.: Trulla trulla trullala, trulla trulla trullala
ond kommt mit d'r Wurzelbürscht, dass da wieder sauber wirscht.

Doch em Keller komsch d'r vor,
wia en ma Geheimlabor,
jeder braut noch seim Rezept,
was henderher gewaltig schmeckt.

Ref.: Trulla trulla trullala, trulla trulla trullala
jeder braut noch seim Rezept, was henderher gewaltig schmeckt.

Ond isch dann d'r Saft vergora,
hot er d' Abführkraft verlora
d'r Aastich folgt mit viel Gefühl,
hoffentlich verspritzt net viel.

Ref.: Trulla trulla trullala, trulla trulla trullala
d'r Aastich folgt mit viel Gefühl,hoffentlich verspritzt net viel.

So jetzt wär des Liadle gsonga,
hot's uich reacht en'd Aura klonga,
wer des Mooschtes Kraft it kennt,
der wois it was er verpennt.

Ref.: Trulla trulla trullala, trulla trulla trullala
wer des Mooschtes Kraft it kennt,der wois it was er verpennt.